في أول 10 سنوات من عمري، لازم نكون متعلم 10 حاجات أساسية، ما تستنوش لين نطق العشرة باش تقولوهالي! لازم قبلها بعام، أو عامين، وفي أمور لازم نكون واخذ فكرة عليها من لما عمري 5 سنين... لو كنت أب أو كنتي أم فمن مسؤوليتك تعليمي هالأمور، لكن حتى لو كنت أخ كبير، أخت كبيرة، جد أو جدة، خال أو عم أو أو او... أو حتى أبلة تقري في أول خمس سنوات في الابتدائية، ياريت ماتبخلوش عني بالتوجيه لو كنتوا تحبوني وتخافوا عليّا
لازم نكون نعرف كيف نتوضأ ونصلي صح، ومتدرب على الصلاة، لأني توة بعد ما سكرت عشر سنوات مفروض نداوم على الصلاة، ذكروني بيها وما تنسوش، لأني مرات ننسى، ومرات لما نلقاكم ناسيين ندير روحي ناسي، وهذا مش حيفيدني لما نكبر
لازم نبدا نتدرب على الصوم، ونتحمل الجوع والعطش، بشرط إني ما نكونش مريض أو عندي أي مشاكل صحية ممكن تخلي الصوم يضرني، ونتسحر ونفطر وناكل أكل صحي بكميات تساعدني على الصوم، ماتخلونيش نحسّ إن الصيام صعب وتقولولي مازلت صغير! وفي نفس الوقت ماتشدوهاش في جرتي كان فطرت وماقدرتش نكمل اليوم! مرة تصيب ومرة تخيب لين نتعود
لازم نكون تعلمت كيف نقص ظوافري بنفسي، ونمشط شعري بنفسي، ونغسل سنوني كويس وحتى ندوّش بروحي بدون مساعدة من حد، يعني نكون قادر إني نهتم بنظافتي الشخصية ونتحمل مسؤوليتها.
عرّفوني على جسمي اللي تعودت عليه بشكل معين، وقولولي شن اللي بيتغير فيه، وشن اللي حنحسّ بيه.. باش نكون مستعدّ، وما نحسش بالخوف أو بالذنب لما يصير أي تغيير. ما تستنوش لين تبدا التغييرات وتلاحظوها، لأن في حاجات مش حتبانلكم إلا متأخر وأنا صعب نعرف كيف نتصرف ونتعامل معاها!
نبهوني وحذروني، عرفوني شن حدود الناس معاي، وكيف إني لازم نمنع أي حد مهما كانت صلة قرابته إنه يلمس المناطق الحساسة والخاصة من جسمي، والأفضل إنه ما يلمسش أي مكان يغطيه الدبش.. وإن هالشي لو صار لازم نقوللكم بأسرع ما يمكن، وإني ما نخافش لأن هذا مستحيل يكون ذنبي.
خلوني نساعدكم في شغل الحوش حتى لو قلتلكم ما عنديش نية ودرتلكم دراما، خصصولي واجبات منزلية زي كل واحد منكم، لأني لو ماتعلمتش نرتب وانظف المكان اللي نعيش فيه حنتعب في حياتي لما نكبر.. ما تفسدونيش بدلالكم، عمره ما كان الدلال دليل حب
لازم نكون عارف كويس إن الاهتمام بخوتي مهم، وإنه مش واجب الكبار بس، نحنا عيلة ولازم كلنا نخافوا على بعض ونردوا بالنا على بعض، الصغير يحترم الكبير، والكبير يعطف عالصغير.
لازم تاكدولي ديما، في كل مرة يصير بينكم أي خلاف إني مش أنا السبب، وإني ماليش ذنب، وإن الخلافات هذي شي عادي ويصير عند كل الناس.. أما لو صار الطلاق، فلازم نكون متأكد إنكم مازلتوا تحبوني مهما صار بينكم
أنا مازلت نحب اللعب، ممكن طريقة لعبي تغيرت على لما كنت صغير، وبديت نلعب بالتلفون والأيباد والكمبيوتر والبلاي ستيشن، بس توة لازم نكون متحمل مسؤولية اللعب أكثر، لازم نعرف مع من ينفع نلعب ومن ما ينفعش نلعب معاه، ونعرف أمتى نوقف لعب، ووين نلعب بالضبط، وكيف مفروض نراعي أوقات وأماكن نوم وراحة عيلتي أو الناس اللي نزلت ضيف عندهم..
لازم نكون تعلمت توة إن الأرض اللي عايشين فيها هذي اسمها بلادنا، وإنه مهما لقينا فيها ناس مش باهية، ماننسوش الناس الطيبة والكويسة اللي تحاول تخلينا نعيشوا مستقبل أحسن.. وإني لما نكبر بنكون "مواطن" كويس زيهم.
زعما قداش من عمره 10 سنين عارف هالحاجات الـ10؟ وشن هي أكثر حاجة تنسوا تعلموهالنا من بينهم؟ وشن هي الحاجة الضرورية اللي مش موجودة بينهم؟
#عيد_الطفل
تعليقات
إرسال تعليق